सायन-चुनाभट्टी जंक्शन बसथांबा कचऱ्याच्या विळख्यात, दुर्गंधीमुळे प्रवाशांचे हाल, रोगराईला खुले आमंत्रण!

मुंबई | ईश्वर ताथवडे, संपादक-: मुंबईला “स्वच्छ” करण्याच्या घोषणा, कोट्यवधी रुपयांच्या जाहिराती आणि स्वच्छतेच्या गाजावाजामध्ये बृहन्मुंबई महानगरपालिका स्वतःची पाठ थोपटत असताना, प्रत्यक्षात सायन येथील चुनाभट्टी जंक्शन, इस्टर्न एक्सप्रेस हायवे पुलाखालील बसथांबा हा अक्षरशः कचऱ्याचे डेपो, दुर्गंधीचे साम्राज्य आणि रोगराईचे प्रवेशद्वार बनल्याचे संतापजनक चित्र समोर आले आहे. बसथांब्याच्या परिसरात साचलेला कुजका कचरा, प्लास्टिक, सांडपाणी आणि असह्य दुर्गंधी यामुळे दररोज हजारो प्रवाशांना नाक दाबून बसची वाट पाहावी लागत आहे. पावसाळ्याच्या पार्श्वभूमीवर हीच घाण डेंग्यू, मलेरिया, लेप्टोस्पायरोसिस आणि इतर संसर्गजन्य आजारांना खुले आमंत्रण देत असून, नागरिकांच्या आरोग्याशी उघडपणे खेळ सुरू असल्याचे या परिसरातील विदारक वास्तवातून स्पष्ट होत आहे. सर्वात धक्कादायक बाब म्हणजे, बृहन्मुंबई महानगरपालिकेचा घन कचरा व्यवस्थापन विभाग आणि एफ/उत्तर विभाग यांची ही गंभीर निष्काळजीपणा नागरिकांच्या जीवावर बेतू शकतो. स्वच्छतेचे दावे करणारे अधिकारी आणि कर्मचारी नेमके कोणत्या भागात स्वच्छता मोहीम राबवत आहेत, असा संतप्त सवाल आता नागरिक उपस्थित करत आहेत. दररोज कचरा उचलल्याचे अहवाल, स्वच्छतेच्या बैठका आणि अभियानांची प्रसिद्धी केली जाते; मात्र प्रत्यक्षात बसथांब्याची अवस्था पाहता हे सर्व केवळ कागदोपत्रीच असल्याचे दिसून येत आहे. हा बसथांबा प्रवाशांसाठी आहे की कचराकुंडी, असा प्रश्न आता नागरिकांच्या मनात निर्माण झाला आहे.

जर हीच बृहन्मुंबई महानगरपालिकेची “स्वच्छता मोहीम” असेल, तर संबंधित ठिकाणी मोठ्या अक्षरात पुढीलप्रमाणे फलक लावण्यात यावा-

“येथे बृहन्मुंबई महानगरपालिकेच्या घन कचरा व्यवस्थापन विभाग व एफ/उत्तर विभागामार्फत विशेष दुर्गंधी संवर्धन व कचरा संवर्धन अभियान राबविण्यात येत आहे. रोगराई वाढवून मुंबईतील लोकसंख्या नियंत्रण करण्याचा हा एक छोटासा प्रयत्न आहे. नागरिकांनी स्वतःच्या आरोग्याची जबाबदारी स्वतः घ्यावी.”

ही उपरोधिक टिप्पणी असली तरी, परिसरातील वास्तव त्याहून अधिक भयावह असल्याचे छायाचित्रे स्पष्टपणे सांगत आहेत.

आज प्रश्न केवळ कचऱ्याचा नाही, तर नागरिकांच्या आरोग्याचा, प्रशासनाच्या जबाबदारीचा आणि करदात्यांच्या पैशांचा आहे. कर भरूनही नागरिकांना जर कचऱ्याच्या ढिगाऱ्यात, दुर्गंधीयुक्त वातावरणात उभे राहावे लागत असेल, तर “स्वच्छ मुंबई” ही घोषणा नेमकी कोणासाठी आहे?

जनता प्रभाव न्यूजच्या माध्यमातून बृहन्मुंबई महानगरपालिका आयुक्त, अतिरिक्त आयुक्त (घन कचरा व्यवस्थापन), एफ/उत्तर विभागाचे सहाय्यक आयुक्त तसेच संबंधित स्वच्छता अधिकाऱ्यांचे तातडीने लक्ष वेधण्यात येत असून, या परिसराची त्वरित साफसफाई, निर्जंतुकीकरण आणि नियमित स्वच्छतेची व्यवस्था करण्यात यावी. तसेच या गंभीर हलगर्जीपणासाठी जबाबदार अधिकाऱ्यांची चौकशी करून त्यांच्यावर कठोर प्रशासकीय कारवाई करण्यात यावी, अशी नागरिकांची तीव्र मागणी आहे.

जनता प्रभाव न्यूज

“आवाज लोकशाहीचा!! प्रभाव जनतेचा!!!”