🚨 विशेष वृत्त | मुंबईचा श्वास गुदमरला!

धारावी–सायन वाहतूक व्यवस्थेचा बोजवारा; रुग्णवाहिका, अग्निशमन दलही वाहतूक कोंडीत, ज्येष्ठ नागरिकांसाठी पादचारी पूल ठरला शिक्षेचा मार्ग!

सायन रेल्वे पुलाचे रखडलेले काम, रस्त्यांवरील अतिक्रमण, अनधिकृत पार्किंग, फेरीवाल्यांचा विळखा आणि नियोजनशून्य वाहतूक व्यवस्था; महिला, विद्यार्थी, ज्येष्ठ नागरिक, दिव्यांग आणि रुग्णांच्या सुरक्षिततेवर गंभीर प्रश्नचिन्ह.

जनता प्रभाव न्यूज | मुंबई-: मुंबईतील सर्वाधिक वर्दळीच्या धारावी–सायन परिसरातील वाहतूक व्यवस्था दिवसेंदिवस अधिकच ढासळत चालल्याचे वास्तव समोर येत आहे. सायन रेल्वे स्थानक परिसरातील अनियंत्रित रिक्षा-टॅक्सींची गर्दी, तीन वर्षांहून अधिक काळ रखडलेले सायन रेल्वे पुलाचे काम, रस्त्यांवरील फेरीवाल्यांचे अतिक्रमण, अनधिकृत पार्किंग आणि वाहतूक नियोजनाचा अभाव यामुळे लाखो नागरिकांना दररोज जीव मुठीत धरून प्रवास करावा लागत असल्याची भावना स्थानिक नागरिक व्यक्त करत आहेत. सायन रेल्वे स्थानक परिसरात पादचाऱ्यांसाठी सुरक्षित मार्ग जवळपास अस्तित्वातच नसल्याचे चित्र आहे. शाळकरी मुले, महिला, ज्येष्ठ नागरिक, दिव्यांग आणि नोकरदार वर्गाला वाहनांच्या गर्दीतून मार्ग काढताना मोठी कसरत करावी लागत आहे. गर्दीचा फायदा घेत चेन स्नॅचिंग, पाकीटमारी, मोबाईल चोरी तसेच महिलांच्या छेडछाडीच्या घटनांबाबतही नागरिक चिंता व्यक्त करत आहेत. त्यामुळे नागरिकांच्या सुरक्षिततेबाबत गंभीर प्रश्न उपस्थित होत आहेत.

ज्येष्ठ नागरिकांसाठी पादचारी पूल की शिक्षेचा मार्ग?

सायन रेल्वे पुलाचे काम सुरू असल्याने धारावीहून सायनकडे आणि सायनहून धारावीकडे ये-जा करण्यासाठी अनेक नागरिकांना पादचारी पुलाचा वापर करावा लागत आहे. मात्र उंच पायऱ्या, लांबचा वळसा आणि लिफ्ट किंवा एस्केलेटरसारख्या सुविधांचा अभाव यामुळे हा पूल ज्येष्ठ नागरिक, दिव्यांग, हृदयविकाराचे रुग्ण, गर्भवती महिला आणि लहान मुलांसह प्रवास करणाऱ्या नागरिकांसाठी मोठे आव्हान ठरत आहे. अनेक ज्येष्ठ नागरिकांना पायऱ्या चढणे-उतरणे कठीण जात असल्याने त्यांना शारीरिक त्रास सहन करावा लागतो. परिणामी काही नागरिक जीव धोक्यात घालून रस्ता ओलांडण्याचा प्रयत्न करतात. त्यामुळे अपघाताचा धोका वाढत असल्याची भीती स्थानिक नागरिक व्यक्त करत आहेत. विकासकामांसोबत सर्वसमावेशक आणि सुलभ पादचारी सुविधा उपलब्ध करून देण्यात आल्या आहेत का, असा प्रश्नही उपस्थित होत आहे.

९० फूट रस्ता की अवघी २० फूट जागा?

सायन रेल्वे पुलाचे काम रखडल्यामुळे वाहतूक कृष्णन मेनन मार्ग (९० फूट रस्ता) आणि लोकमान्य टिळक रुग्णालय मार्गे वळविण्यात आली आहे. मात्र पर्यायी मार्गांवर प्रभावी वाहतूक व्यवस्थापनाचा अभाव असल्याने दिवसभर वाहतूक कोंडी होत आहे. नावाला ९० फूट असलेला हा रस्ता प्रत्यक्षात फेरीवाले, अनधिकृत पार्किंग, दुकानांचे अतिक्रमण आणि बेशिस्त वाहनांमुळे मोठ्या प्रमाणात अरुंद झाल्याचे स्थानिकांचे म्हणणे आहे. त्यामुळे वाहतूक कोंडी हा अपवाद नसून दैनंदिन वास्तव बनला आहे.

रुग्णवाहिका आणि अग्निशमन दलालाही नाही मोकळा मार्ग

या वाहतूक कोंडीची सर्वाधिक गंभीर बाजू म्हणजे रुग्णवाहिका आणि अग्निशमन दलाची वाहनेही वेळेत मार्ग काढू शकत नसल्याची तक्रार नागरिकांनी केली आहे. जीव वाचविण्यासाठी धावणारी रुग्णवाहिका आणि आग विझविण्यासाठी धावणारे अग्निशमन दलच वाहतूक कोंडीत अडकत असेल, तर ती केवळ वाहतुकीची समस्या राहत नाही; ती सार्वजनिक सुरक्षिततेसाठी गंभीर इशारा ठरते.

वाहतूक नियोजन की केवळ दंडात्मक कारवाई?स्थानिक नागरिकांच्या मते, वाहतूक कोंडीची मूळ कारणे असलेल्या अतिक्रमण, अनधिकृत पार्किंग आणि बेशिस्त वाहतुकीवर सातत्यपूर्ण व परिणामकारक कारवाई होत नसल्याची भावना आहे. वृत्तांकनासाठी येणाऱ्या पत्रकारांनाही वाहतुकीच्या अडचणींचा सामना करावा लागत असल्याचे सांगितले जाते. त्यामुळे नागरिक प्रश्न विचारत आहेत—वाहतूक नियंत्रणाला प्राधान्य दिले जाणार की केवळ दंडात्मक कारवाईवरच भर राहणार?

जनतेचे थेट सवाल…

१) सायन रेल्वे पुलाचे रखडलेले काम पूर्ण होणार तरी कधी?

२) ज्येष्ठ नागरिक, दिव्यांग आणि रुग्णांसाठी सुलभ पर्यायी व्यवस्था कधी उपलब्ध होणार?

३) पादचारी पुलावर लिफ्ट किंवा एस्केलेटरची सुविधा का उपलब्ध नाही?

४) रुग्णवाहिका आणि अग्निशमन दलासाठी स्वतंत्र आपत्कालीन मार्गाची व्यवस्था कधी होणार?

५) ९० फूट रस्ता अतिक्रमणमुक्त करून वाहतूक सुरळीत करण्यासाठी ठोस कृती आराखडा कधी राबविण्यात येणार?

६) एखादी मोठी दुर्घटना घडण्यापूर्वी संबंधित यंत्रणा प्रभावी पावले उचलणार का?

जनता प्रभावचे मत-: धारावी–सायनमधील वाहतूक कोंडी हा केवळ वाहनांचा प्रश्न राहिलेला नाही. तो ज्येष्ठ नागरिकांचा सन्मान, दिव्यांगांचे हक्क, महिला व विद्यार्थ्यांची सुरक्षितता, आपत्कालीन सेवांची कार्यक्षमता आणि नागरिकांच्या मूलभूत जगण्याच्या अधिकाराशी संबंधित गंभीर विषय बनला आहे. विकासकामे आवश्यकच आहेत; मात्र ती नागरिकांच्या सुरक्षिततेशी तडजोड करून होऊ नयेत. रस्ते अतिक्रमणमुक्त करणे, वाहतूक शिस्तबद्ध करणे, पादचाऱ्यांसाठी सुरक्षित आणि सुलभ व्यवस्था उभी करणे, तसेच रुग्णवाहिका व अग्निशमन दलासाठी अखंड आपत्कालीन मार्ग उपलब्ध करून देणे ही सुरक्षित, सन्माननीय आणि सक्षम भविष्यासाठी अपरिहार्य गरज आहे. लोकशाहीत प्रश्न विचारणे हा गुन्हा नसतो; तो प्रत्येक नागरिकाचा घटनादत्त अधिकार असतो. उत्तरदायित्व स्वीकारणे ही प्रशासनाची जबाबदारी असते. जनतेच्या प्रश्नांना न्याय मिळेपर्यंत “जनता प्रभाव”चा आवाज बुलंद राहील. कारण विकासाचा खरा अर्थ केवळ उड्डाणपूल किंवा इमारती नव्हे, तर प्रत्येक नागरिकाचे सुरक्षित, सन्माननीय आणि विश्वासार्ह भविष्य घडविणे हा आहे.