ठाणे | श्रावण आहिरे, ठाणे शहर ब्युरो चीफ-:भारतीय हवामान विभागाने (IMD) ठाणे जिल्ह्यासाठी दि. ६ जुलै २०२६ रोजी मुसळधार ते अतिमुसळधार पावसाचा ‘ऑरेंज अलर्ट’ जारी केल्याने संभाव्य पूरस्थितीचा धोका लक्षात घेऊन ठाणे जिल्हा प्रशासनाने महत्त्वपूर्ण निर्णय घेतला आहे. जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष डॉ. श्रीकृष्ण पांचाळ यांनी आपत्ती व्यवस्थापन अधिनियम, २००५ अंतर्गत प्राप्त अधिकारांचा वापर करून ठाणे जिल्ह्यातील सर्व अंगणवाड्या, बालवाड्या तसेच शासकीय, निमशासकीय प्राथमिक व माध्यमिक शाळांना सोमवार, दि. ६ जुलै २०२६ रोजी सुट्टी जाहीर केली आहे.

हवामान विभागाच्या अंदाजानुसार जिल्ह्यात अनेक ठिकाणी मुसळधार ते अतिमुसळधार, तर काही ठिकाणी अत्यंत मुसळधार पाऊस होण्याची शक्यता आहे. तसेच IMD National Flash Flood Guidance Bulletin मध्येही ठाणे जिल्ह्यासाठी संभाव्य पूरस्थितीबाबत सतर्कतेचा इशारा देण्यात आला आहे. विद्यार्थ्यांची सुरक्षितता, वाहतुकीवरील संभाव्य परिणाम आणि आपत्कालीन परिस्थिती लक्षात घेऊन हा निर्णय घेण्यात आला आहे.

सर्व संबंधित विभागांना आदेशाच्या प्रती

जिल्हाधिकारी डॉ. श्रीकृष्ण पांचाळ यांनी जारी केलेल्या आदेशाच्या प्रती तातडीने पुढील विभागांना पाठविण्यात आल्या असून, आवश्यक ती कार्यवाही करण्याचे निर्देश देण्यात आले आहेत.

• ठाणे जिल्ह्यातील सर्व महानगरपालिकांचे आयुक्त
• मुख्य कार्यकारी अधिकारी, ठाणे जिल्हा परिषद
• पोलीस आयुक्त, ठाणे शहर
• पोलीस आयुक्त, नवी मुंबई
• पोलीस अधीक्षक, ठाणे (ग्रामीण)
• जिल्हा शिक्षणाधिकारी (प्राथमिक)
• शिक्षणाधिकारी (माध्यमिक)
• सर्व उपविभागीय अधिकारी (SDO)
• सर्व तहसीलदार तथा तालुका आपत्ती व्यवस्थापन अधिकारी
• संबंधित सर्व प्रशासकीय यंत्रणा

जिल्हा प्रशासनाने सर्व यंत्रणांना परिस्थितीवर बारकाईने लक्ष ठेवून आवश्यक ती प्रतिबंधात्मक उपाययोजना करण्याच्या सूचना दिल्या आहेत.

दरम्यान, नागरिकांनी अत्यावश्यक कामाशिवाय घराबाहेर पडणे टाळावे, नदी-नाले, पूल, सखल भाग आणि जलाशयांच्या परिसरात जाणे टाळावे तसेच हवामान विभाग आणि जिल्हा प्रशासनाकडून वेळोवेळी जारी करण्यात येणाऱ्या अधिकृत सूचनांचे पालन करावे, असे आवाहनही करण्यात आले आहे.

जनता प्रभाव न्यूज
“आवाज लोकशाहीचा!! प्रभाव जनतेचा!!!”