जातीय भेदभावाच्या आरोपांची निष्पक्ष चौकशी करून साहिल वाकोडे कुटुंबाला न्याय देण्याची मागणी
मुंबई | प्रतिनिधी-: आयआयटी मुंबई, पवई येथील बीटेकच्या द्वितीय वर्षातील विद्यार्थी साहिल रविंद्र वाकोडे यांच्या मृत्यूचे प्रकरण गंभीर वळणावर पोहोचले आहे. साहिलच्या कुटुंबीयांनी संस्थेत त्याच्याशी जातीय भेदभाव व मानसिक छळ झाल्याचे आरोप केले असून, या आरोपांची सखोल आणि निष्पक्ष चौकशी करून दोषी आढळणाऱ्यांवर कायद्यानुसार कठोर कारवाई करावी, अशी मागणी महाराष्ट्र प्रदेश रिपब्लिकन पक्ष (खोरीपा) अध्यक्ष भाऊ निर्भवणे यांनी केली आहे. साहिल वाकोडे यांचा १८ सप्टेंबर २०२६ रोजी आयआयटी मुंबईच्या वसतिगृहातील खोलीत मृत्यू झाला. मृत्यूपूर्वी परीक्षा केंद्रातील मोबाईल फोन वापराच्या कथित प्रकाराचा संदर्भ तपासात समोर आला आहे. या घटनेशी संबंधित सीसीटीव्ही फुटेजही तपास यंत्रणेकडून तपासले जात असून, नेमकी परिस्थिती काय होती, याचा तपास सुरू आहे.
कुटुंबीयांकडून जातीय भेदभावाचा आरोप- साहिलच्या कुटुंबीयांनी त्याच्यावर संस्थेत जातीय स्वरूपाचा भेदभाव व मानसिक त्रास झाल्याचा आरोप केला आहे. दुसरीकडे, आयआयटी मुंबई प्रशासनाने साहिलने संस्थेच्या एससी-एसटी सेल किंवा प्रशासनाकडे अशी तक्रार केल्याचे नाकारले होते. त्यामुळे कुटुंबीयांचे आरोप, संस्थेची भूमिका आणि उपलब्ध पुरावे या सर्व बाबींची स्वतंत्रपणे पडताळणी होणे महत्त्वाचे ठरते.
प्राध्यापकाविरुद्ध गुन्हा; तपास गुन्हे शाखेकडे-साहिलच्या वडिलांच्या तक्रारीवरून प्राध्यापक सूर्यनारायण डुल्ला आणि अन्य व्यक्तींविरुद्ध आत्महत्येस प्रवृत्त केल्याचा आरोप तसेच अनुसूचित जाती व अनुसूचित जमाती (अत्याचार प्रतिबंधक) कायद्याच्या संबंधित तरतुदींनुसार गुन्हा नोंदवण्यात आल्याचे वृत्त आहे. मुंबई पोलिसांची गुन्हे शाखा या प्रकरणाचा तपास करत असून विद्यार्थी, शिक्षक व कर्मचाऱ्यांचे जबाब नोंदवण्यात आले आहेत. प्रा. डुल्ला यांना चौकशीच्या काळात रजेवर पाठवण्यात आल्याचेही वृत्त आहे. तसेच आयआयटी मुंबईने प्रकरणाच्या परिस्थितीची चौकशी करण्यासाठी १० सदस्यीय समिती स्थापन केली होती. या समितीला अधिक सखोल आणि निष्पक्ष चौकशीसाठी आणखी एक आठवड्याची मुदत देण्यात आल्याचे २८ सप्टेंबरच्या वृत्तांमध्ये नमूद आहे.
सीसीटीव्ही आणि मोबाईल तपासाचा महत्त्वाचा भाग-परीक्षा केंद्रातील सीसीटीव्ही फुटेजमध्ये साहिल आणि पर्यवेक्षक यांच्यातील घटनेशी संबंधित हालचाली तपास यंत्रणेला दिसल्याचे वृत्त आहे. साहिलचा मोबाईलही तपासासाठी ताब्यात घेण्यात आला असून त्यावरील लॉकमुळे त्यातील काही माहिती मिळवण्यास तपास यंत्रणेला अडचण येत असल्याचे वृत्त आहे.
भाऊ निर्भवणे यांची मागणी- या संपूर्ण प्रकरणात कोणत्याही एका बाजूचा दावा अंतिम सत्य मानण्याऐवजी साहिलच्या मृत्यूपूर्वीच्या संपूर्ण घटनाक्रमाची, जातीय भेदभावाच्या आरोपांची, परीक्षा केंद्रातील घटनेची, उपलब्ध सीसीटीव्ही फुटेजची आणि संबंधित अधिकाऱ्यांच्या भूमिकेची स्वतंत्र चौकशी करण्यात यावी, अशी मागणी भाऊ निर्भवणे यांनी केली आहे. दोषी व्यक्ती तपासात निष्पन्न झाल्यास त्यांच्यावर अनुसूचित जाती व अनुसूचित जमाती (अत्याचार प्रतिबंधक) कायद्यासह लागू असलेल्या इतर कायद्यांनुसार कारवाई करण्यात यावी. तसेच साहिल वाकोडे यांच्या कुटुंबाला न्याय मिळण्यासाठी शासनाने आणि संबंधित तपास यंत्रणांनी प्रकरणाची पारदर्शकपणे चौकशी करावी, अशी मागणी करण्यात आली आहे. दरम्यान, साहिलचे पालक २८ सप्टेंबरपासून मुंबईतील आझाद मैदान येथे आंदोलन/उपोषण सुरू करण्याच्या भूमिकेत असल्याचे वृत्त आहे. कुटुंबीयांनी दोषींवर कारवाईची मागणी कायम ठेवली आहे.
जनता प्रभावचा सवाल ? साहिलच्या मृत्यूमागील नेमकी कारणे काय होती? जातीय भेदभावाचे आरोप तथ्याधारित आहेत का? परीक्षा केंद्रातील घटनेनंतर नेमका घटनाक्रम काय घडला? आणि संबंधित सर्व व्यक्तींची भूमिका काय होती? या प्रश्नांची उत्तरे निष्पक्ष तपासातूनच समोर येणे आवश्यक आहे. दोषी आढळणाऱ्यांवर कायद्यानुसार कारवाई आणि निर्दोष व्यक्तींवर अन्याय होणार नाही, अशी पारदर्शक चौकशी होणे हीच या प्रकरणातील न्याय्य प्रक्रिया ठरेल.
जनता प्रभाव न्यूज-आवाज लोकशाहीचा!! प्रभाव जनतेचा!!!
🌐 jantaprabhavnews.co.in | 📞 9967999300
